Несколько слов о латинском алфавите… (каз)

     Елбасы Н.Ә.Назарбаевтың «Болашаққа бағдар: рухани жаңғыру» деп аталатын мақаласында қазақ тілін біртіндеп латын әліпбиіне көшіру жұмыстарын бастап, бұл мәселені неғұрлым дәйектілікпен терең түсініп, байыппен қарау қажеттігін тілге тиек етті. Латын әліпбиіне көшу — заман талабы. Ұлы Дала елінің тарихына көз жүгіртсек, бірінші тұғыры байлық — жер, екінші — тіл, үшіншісі — мемлекет және оның тарихы болуы керектігі айқындалады. Ағартушы-педагог ғалым Ахмет Байтұрсынұлы айтып кеткендей, «Ұлттың сақталуына да, жоғалуына да себеп болатын нәрсенің ең қуаттысы — тілі» деген. Алаш қайраткерлері де латын әліпбиін жазу-сызуда қолданды. Бұл бізге таңсық дүние емес. Латын әліпбиі әлемде кеңінен қолданылады. Латын әліпбиіне көшу — ұлтымыздың санасын бұғаудан босатады, түркі және жаһандық әлемімен ықпалдасуға, қазақ халқы ертеден қолданған әліпбиімізге қайта оралып, ұлттық санамызды қайта жаңғыруына жол ашады. Сонымен қатар, бүгінгі компьютер заманында латын әліпбиінің үстемдігі бәрімізге белгілі. Электрондық поштамыздың, көлігіміздің нөміріндегі әріптер, төлқұжатымыз да латын жазуларымен жазылған. Қазіргі күнгі жастарға латын әріптерін үйрену қиындық келтірмейді деп ойлаймын. Өйткені жастардың көбісі ағылшын тілін мол қолданады. Ал, біздегі әріптер ағылшын тіліне де ұқсас болып келеді. Дәл қазіргі сәттің өзінде байқағаным дүкендерден, аурухана мен түрлі мемлекеттік және мемлекеттік емес ұйымдардан, білім ошақтарынан латын тілінде жазылған сөздерді көруімізге болады. Тағы да біздің құнды кітаптарымыздың барлығы да латын тілінде қайтадан жазылып жатыр. Осылай жасасақ қана сауаттылық деңгейіміз артып, тасымыз өрге домаламақ. Бірақ, тіл тазалығымызды сақтап, өз елімізді биік белестерден көру, Қазақстанның атын бүкіл ғаламға әйгілі ету біздің қолымызда деп ойлаймын. Демек, латын әліпбиі бізге таңсық емес. Дана халқымыз айтпақшы «Өзге тілдің бәрін біл, өз тіліңді құрметте!» деп, тіліміздің тазалығы үшін, тілді үйренуді жеңілдету үшін осы бастаманы қолдап, енгізу — Сіз бен біздің қолымызда.

«Конай» кітапхана-филиалының,

Қостанай облысы әкімдігі білім басқармасының

«Қостанай қаласы білім бөлімінің

Чапаев негізгі орта мектебі»

коммуналдық мемлекеттік мекемесінің кітапханашысы

Саренова Роза Мурзашевна